Exo 13 | TVK | STEP | Di, Iahova biteni mun mi Mosis bit,

Exodus 13

1 Di, Iahova biteni mun mi Mosis bit, 2 “Horam muimol xil vus namim lihe navan, e muimol na vongoro samim xil mun lihe savan.”

11 Ma Mosis biteni mi moletin xil bit, “Iahova itel xamim ha muhe tan na mol-Kenan xil, tan xa xi tehit xati ngamu mi avu namim xil e mi xamim mun. E melele xa isa ni mi xamim e muti en, 12 musa xoles horam muimol namim xil lihe nan. E mupol ni imak mi muimol te vongoro samim xil mun xa lihe malohos. 13 E muimol xil vus te dongki samim xil xa labe malohos, muhu vul hiraexil tengan ipisen ni xa labe sa Iahova kestang. E xosxa mubit munahu vin ti e xil, ma mukila muxal rati ra Iahova ni sipsip tei. E horam muimol namim xil mun, muxal rati rani. 14 E huram xil xa ti mei, xosxa horamue tei nam isisuk ni koute te sexien xil ak, ma uhiteni mini uhit, “Melele xa ratehe slev tamu e hal Isip, Iahova iaxa telah reret xir texo xeihen nan xa eilep pupu. 15 Melele xa tepusi xa suv toto tahal Isip, vatin te xeih e en ti tenavei tengan vamaen xir ramea ra xeihen nan, Iahova tehas vin horam muimol xil vus na mol-Isip xil teha tetuxoh muimol te vongoro sae xil. Ve rin ak vari iaxa xir di rasa sein meulien na muimol xil vus te vongoro sar xil xa labe malohos ba mi Iahova nggoni sanien eo tei mini. E horam muimol nar xil vus, xir di ranggal rat xil rani.' 16 Sexien xil ak ihe simeleleen tei e meulien namim ixoni ngan xa di e vatumim mu di e hemim tengan munem xati vehakut xa Hi telah rat xamim ra hal Isip tetel xeihen nan.”

20 Di, lamea reling metimal tahal Sakot e labe ladi ut Itam xa de seri uruvuol. E rute ak, xil lapol ni horao mae xil en. 21 E kakaoen xil nae, Iahova iaxa di del xil. E melengien, lapusi nggoni momah xa misoh mal be nesao e di diamu ni xil, e vongien, lapusi biles mei be upang tei xa di pili e mileluv xol suse nae. Misak ni xil lakila lakakao e melengien e vongien.